唔好死住

話說好不容易在香港找到一個經方派中醫，星期一早上去看第二趟。

「見點呢？」我話其實感覺不強烈，好就係好左，不過……又唔係好強勁咁。醫師問了一些基本問題，用三根手指，搭上我的左臂脈上，再一次閉上眼睛，按左有兩分鐘吧。

然後在方上開始寫，寫到最後，與上星期的舊方對照，然後，諗諗諗，諗左我諗有十分鐘。十分鐘的沉默。

嘩，真係諗左好耐，好耐。我心諗，係咪我已經陰陽兩虛，大限將至呢。呢排睇得醫案多，話癌症（陰實）、紅瘡狼班（陰陽兩虛）等，都唔只係身病了，心更多少都病了，連身體都不想活了。喂，呢排我想做人喎。

時間好長，我眼睛四圍望，房中乜都無，桌上就只有筆、病歷，牆上只有一張告示，寫住：病人睇病時記得熄電話喎。

然後他在上面多寫了兩行字，說「可以了」，我問都唔敢問，走佬。

兩個月前我其實諗過，如果我有乜衫長褲短，其實此生不算孝順也不算太不孝吧。有近二百萬保額，夠cover層未供完的樓有餘。另外剩的錢，慳慳地，也應該夠兩老過餘生了。

唏，大吉利是。條命咁衰仲有排你捱。

－－－－－－

同網友拿足資料，周二放假去xx銀行開戶，將一半股票落去，貪佢孖展息率低，今年內按左o的股票借筆錢再投資。粗粗地計個條數，咁玩法o岩我性格。

去中環總行，大堂無乜人理我，個保安，面口黑過我日日朝早食既黑豆。佢手指一指，叫我去reception搞。

reception服侍我既姐姐，有o的緊張。不過斯文得o黎，幾好樣，講得兩句知道我開股票戶口，搵左隔籬位姐姐來serve我。一望，第一個感覺係「港女」，直覺係鍾意名牌，好悉心打扮，有四分似官恩娜。上帝，我知我唔應該咁judge人，係壞習慣，不過好難改，見親女人你都會同你自己o個個比較下，然後慣性咁話：庸脂俗粉！

好executive look兼同樣語氣既官恩娜，寫完form突然話要填問卷，走左出來，企左o係我側邊。「你年薪幾多？」我即時有戒心！

「投資佔你總資產幾多%?」我細細聲話「下？95%啦。」「哦咁即係75%啦!（選擇題最高）」「你可承受幾高風險？即係呢，跌幾%會行止蝕？」我：「無喎，唔止蝕架喎。」係咪無人咁答呢？佢噗嚇一笑，「哦。」我心諗，買#5都止蝕？想出聲，不過見佢笑一笑又幾靚。

見佢猛填form，我就問番佢：喂，你地銀行點收費架？乜鬼存倉費呀咁呢，佢話每半年收$100。「下？咁貴，我用開匯豐好似無收喎。」佢話：「有架，間間都有。」唔係喎，係咪戶口夾埋有幾錢就唔使收架？我唔見有既？「有架，你可能無check月結o者，我都有。」我忍唔住笑：「下？你都有，咁搞笑？你都有用……」官恩娜狡猾的望一望我，嫣然一笑。

走時我諗，靚女們日日o係中環打工可能都好無聊。日日對住班中年西裝男人，一號笑容，唔可以講錯野，樣樣有model answer……臨走時畀埋卡片我，我再問佢，佢仲好好笑容咁話：你有乜打畀我啦。好，等我諗下有乜先。

呢，所以話其實巨蟹座情緒化。死？唔好死住。