清明上河圖, 排隊處

每人得六分鐘睇畫喎。都好啦。聽講去羅浮宮睇Mona Lisa都係差不多，幅畫仲細到死，又有防彈玻璃，仲要排幾個鐘入場先睇一兩分鐘，迫餐死。

朋友警告：一時話幅畫未必來到香港，今日又叫我快o的o拿o拿聲去訂飛，唔係好快爆。展期6月29-7月22日，一個月都無呢，快手打佢個訂票熱線，廢的，成個下午無人聽。於是上城市售票網訂，$30一張飛平到笑，但手續費要$13。所以買得多有著數──如果你搵到朋友陪的話，我的畫展同伴是個有夫之婦，連老公都唔陪佢。

訂左飛，可以安心睇超哥本《清明上河圖筆記》。要留意有兩個版本，當然要買貴價版，內容相當精采，商務做緊特價，5仔卡有八折（$153）。

新誌 Monocle

這是Paul Brule創辦的新雜誌Monocle。

這個Paul，最出名一役，是創立當年快同輩幾年的Wallpaper。作為一個雜誌老總，竟然連Wiki都有佢詳細資料。絕對係國際傳媒界的明星。

俗人如我，買這本新書Monolce，當然係因為名牌效應。因為本地傳媒都煲左一陣，一直唔多見市面有。今日撞見，買本見識下。

monocle內容包含五種元素。包括A─Affairs、B─Business、C─Culture、D─Design、E─Edits。



由於又內又外，於是由被傳媒/美藝界劃分為LOHAS 一族。即 Lifestyles of Health and Sustainability（喎）。

所謂LOHAS，其實又係marketing用語，即係 cultural creatives, solution seekers, conscious consumers喎。Wiki話佢地會用：

• Organic and natural food
• Organic and natural personal care products
• Hybrid and electric cars
• Green and sustainable building
• Energy efficient electronics/applicances
• Socially responsible investing
• Natural household products (paper goods and cleaning products)
• Natural and preventive medicine (Naturopathic, Chinese medicine, etc.)

留意Sustainability一字。

計我話，即係學瑜伽、太極，食o野會留意成份，又會買靚衫，內（Health/culture）外（Style）統統都要。

仲無啦啦整o的crossover產品畀你上網賣。架單車幾靚，盛惠六舊水英鎊（型丫喇）。


內容方面比較男人。

這一期包括（好國際化的）：
阿富汗有錢佬大屋（o係阿富汗做乜會發達──ie. 頭五項係1.傳媒大亨 2.建築 3.餐廳 4.毒品 5.時裝）
巴西人字拖王國havaianas訪問（問著個做左得一年o既，捉捉地蟲！）
日本design民宿（好鬼Wallpaper）
仲有好多立立雜雜專題。男人Fashion Styling 都有幾版。

最好睇係個封面故事，講南韓。社會、Business、文化角度講。夠深入，多角度。

原來韓國的歌曲合法download銷售已是cd銷量三倍、首爾已有100% broadband penatration。

韓國的digital industry的確成熟，而且快。報道說韓國後生仔最愛換手機，而且唔怕貴。（好鬼資本腐化主義呀，好鬼香港呀！）以至LG同Prada搞左部Prada Phone，竟然最後才在韓國發售，仲怕唔o岩韓國人口味，因為怕功能唔夠先進。

－－－

三笈第內容本來好o岩我。可惜大概是由於貪心，又要顧及讀者程度，睇左幾篇內容都比較淺（又未至於膚淺，係水過鴨背o個隻）。

$100本，下期唔會買囉。$50？減o的添啦。

買買買

當全公司買得CD最多的兩個同事都Download新歌，唔買碟，hmv部份影碟竟然平過旺角街舖。賣影音，賣可以在網傳播的「波凸」真難做。

經過信和門前那幾個「屍屍縮縮」的道友樣哥仔，細聲嗌住「3仔4仔」，我覺得佢眼睛講緊：「你再唔買我就死喇喂」。想當年（其實五年前吧），星際的鹹/翻版碟陣不知幾人山人海。

呢個禮拜hmv平霸有
1.de niro boxset $149
（含HEAT、The misson、The Boy's Life、Goodfellas、City by the sea，其實我已經有Goodfellas，不過太平了吧。）
2. Original羔羊 $49（當年出前傳，全港斷晒市賣到過二百蚊張。）
3. Cube心慌方 $49（平呀平，試！）
4. 波蘭斯基《唐人街》$49（搵唔到《怪房客》）
5. 活地阿倫Mahattan $49（其實我有隻好舊版，無字幕，你知阿倫伯一輪嘴實在聽死我。）
6.希老治閣To Catch a Thief $49（得呢隻咁平）
7.yes "chase to the edge"（得一隻音樂碟抵買）

Natalia Vodianova

ck underwear在SOGO外的那張超巨型海報，真美。

Natalia Vodianova的線條，真要命。

聞說熱門位置的outdoor廣告是過百萬月費的。要賣幾個bra才夠呢？我相信女孩子看到她、又或看到男朋友目不轉睛時，一定捨得買。

道長訪問超哥喎

據梁文道說，第一期《讀書好》印了共三萬本。我記得自己拿了一本後，一個星期後多拿了一本給我媽看，前後超過十日，可見「銷售」速度不是那麼快。新一期剛推出，前天有朋友在apm拿了，今天msn我：今期訪問超廣超！下班到旺角去找，已經一本不剩。

問sales：喂，乜無晒《讀書好》啦咩？
sales姐姐（笑）：半日就無晒囉！
再問：上期我見擺左成個星期喎？
sales姐姐（笑）：上次我地派左日半啦。

好彩有網上版。快睇

網絡萬歲！

有山卡罅地方仲有剩的話，麻煩火速通知我。

--------------------------------------------

訪問其實沒想像中精采啦。好一些話，我都看過聽過。不過以下這一段還是說到我心坎裡去，剛巧也是近日提醒自己的話。重覆重覆重覆練習，re-discover、re-discover、re-discover。而不過，世上只有很少人、很少書、很少音樂很少事值得讓你重覆。我把他們稱為「有價值」。

我跟學生上課，我會跟他們說，要先收起一個流行的概念，那就是原創，現在所有人都談原創，但在第一流的畫家來說，原創其實可以叫做「失禁」，你說你的水墨 是原創，但在中國的藝術領域當中，只不過是二流罷了。先別怕重複抄寫，它也可以是種創作，我自己就常常利用重複的方法來改變一些老東西的意義。重複並非災 難，無目的重複才是不好。例如看手錶這個動作，某人跟你說話的時候突然低頭看錶。第一次你會覺得這個人很有時間觀念，第二次你會想他是否趕時間，再看的時 候你會懷疑他是否不耐煩，第四次看你會以為他很討厭你……當你不斷重複同一個動作，動作本身的意義就會隨之改變。

外國的月亮

北歐美嗎？以我去得最多的瑞士計，當然美。瑞典也美，而且英語是第二語言，方便（瑞士用4種語言：德語──其實叫swiss-german，與german有別、法語、意大利語及一種當地山區語言。銀紙上有齊4種）。只去過一次的印象是瑞典人更親民。你知道，歐洲人是可以不把你Asian看在眼裡的。（特別是法國人）

我沒有看過很多外國的月亮，不過老老實實，看到的大都比香港的漂亮。主因當然是光污染。近年出生的小朋友，有沒有機會看到星星了？

外國的天空，大多也是特別藍的。這個印象，不知是否源於我一係去很先進、一係去很落後的地方？

空氣污染的最大元凶，固然是煤，燒煤最污糟是常識了。可惜我們祖國所謂地大物博，其實石油、黃金、鑽石都不多，最多就係煤。不過煤太平宜，早前返鄉下，親人就是以煤餅燒開水的。每個媒餅二毫子，可燒半日。

先天不足，後天更需努力。富起來後，希望領導人會學學外國的環保政策。我不特別喜歡瑞士這個國家（人不算很友善），但他們的城市規劃、環保、保育還是令人敬服的。

日內瓦是世界著名財經城市吧？這個城市，完全沒有要建些甚麼高樓大廈來告訴你「我呀威呀有錢呀」的意圖。這就是自信，也是驕傲。也許最應該去看清楚的是曾先生與上海市市長。

朝早六點半的蘇黎世。

城市以電車為主要交通公具。另有有軌巴士。踩單車的人也多。

河呀河，應該是有魚的，不像城門河。魚我沒看清楚，倒是河上有很多……

天鵝！會飛的。不是鵝！
有一天早上起來趕著去工作，天濛光時見到，更美！


日內瓦到處都是矮矮的舊房子＋架空電纜，本來幾醜。但環保嘛，主要是有軌巴士用、電車用的。
前面這位西裝哥哥，是踩著rollerblade返工的，我仲見過全套tailormade西裝踩單車的，幾型。可能是個銀行經理……

火車站個個都是百年老店，即係呢，令我諗起天星碼頭囉。
入到裡面，看看那個如大教堂的超高樓底，感受更深，非我攝影技術可表達。

的士

瑞士的的士，甚麼牌子顏色都有。有時坐benz，有時坐honda。

CHF6.5起錶，即差不多HK$45。當然貴，歐洲尤甚北歐有乜唔貴架。普通一個熱狗都要CHF8.5，即係成60蚊。總之香港花港紙10蚊既，瑞郎就收番你10蚊左右。去過幾式次後我粗略為認為瑞士物價水平是香港的5倍或以上（averge係3-7倍啦）！

同一個瑞士人傾偈，佢o係北京住過（我地用國語溝通），佢話租一間屋，80坪（即係800-1000呎喎），4間房，月租CHF1,200，即係8,400，相對來講真係平。

貴7倍的的士，分別是司機見你有行李，一定會落來幫你搬上車尾廂。我仲試過o係酒店call的士，做我十幾蚊（瑞郎）生意，佢等我齊人都等左十多分鐘，車程其實只有五分鐘，但司機態度一流，完全無詐型。o岩o岩返香港o個程，個香港司機其實幾有禮貌，但見我4件行李（2大+2細），就係司機位都未離開過，當然亦唔會落來幫你（搬行李上車尾廂）啦！

佢話自己97年前月搵2萬，而家開夜班月入8000-9000。收入跌左，我好相信佢無諗過自己o既service十年來有無改善左──囉。

歐遊小休

其實係公幹，不過想當係去玩。咁樣o既工作/生活態度應該會有趣o的。

第一次靠老友口頭教，自製鹹柑橘。粗鹽醃左兩、三星期後開始出水。十日後再返來睇下你點呀下。

清明上河來港喎

大劑，可能要請一個禮拜去睇。


清明上河圖落實來港 首度離京展出

【明報專訊】行政長官曾蔭權昨日參觀北京的故宮博物館、首都博物館後，主動向記者公布一個好消息，他確定國寶《清明上河圖》將首次離開北京，今年中運到香港作慶祝香港回歸10周年的珍貴展品之一。早前，內地一批專家反對《清明上河圖》送到香港展出，擔心此舉可能對這幅稀世國寶帶來不必要損耗。專家曾說，故宮對該畫保護有非常嚴格的要求，由於每打開一次就會損傷一次，規定幾年才能展出一次。

關於清明上河link
wikipedia的解畫
3000 x 700超長未砌割原圖

敬畏

我的工作性質附帶著大量的等待，像大家一樣是現代人，往往習慣用上網填補這空隙。日頭又望著個盒夜晚又望著個盒，外星人看見一定覺得很好笑。
無聊去Search「趙廣超」，看了以下一大段文字，記錄趙到大學後跟他們上的一課，閱後不得不說「歎服」。再睇番，原來個網係漫畫家智海的。他在寫了一大段文章後，最後寫上這一句：

下課後一直說不出話來。
x x x
組織了幾天。我想那近乎一種極大的敬畏。

以下為當天，智海上課途中抄下趙的談話，我想，對文化（不論是否對中國文化有feel的）都會有所啟發吧。老套都再說一次：我是趙先生小Fans，如果可以，真想再入天水圍找他說說話。先copy趙先生給同學的講義，當中只有三行字：

一、年青時總有些自以為了不起的長處，漸漸才發覺：「木桶的容量，是最短那一塊木頭決定的。」
二、學習與創作：「每一滴水看起來都可有可無，要泛起漣漪，少一滴都不可以。」
三、文化習氣：「中國文化有別人所沒有的綜合力，麻煩的是在分析時都在做結論。」

關於中國藝術……

「後來有一次我認識了廣州藝術學院(？)的一位教授(抱歉忘了名字)，他是我一生所認識的人中，品格情操最崇高的一個人，他的謙恭，他待人處事，非常令人欽佩。可是看他畫的國畫，令人難以置信，有力、澎湃，人們不相信這種強大的、甚至是激烈的筆風竟是出於眼前這一位謙謙有禮的老翁──」趙先生拿起筆，在白板上慢慢地、慢慢地畫出一條橫線，說：「這條線，就是中國藝術了！中國藝術家窮一生畫畫，到他臨死斷氣的一刻所畫出的，就正是這麼一條謹慎得可以的橫線。學過了西方藝術，綜觀過西方藝術的發展，當我發現這一點的時候，我感受非常之震驚而且非常困惑：中國藝術的表達是把一切一切再強大的情感的力量收歛、隱藏，收回成一條像這樣的橫線。我覺得非常震驚。」

關於現代藝術

「現今的藝術，史無前例地懦弱，一味追求Impact，只管製造 Impact來填補內心的茫然和焦慮，而全然把美遺忘了，甚至不知道什麼是美──知性和感性之間存在一種intimacy，世上只有透過藝術品或藝術活動可以達到這intimacy，將兩者接連。藝術的探求最終是有是非之分，這是一個是非問題。畢竟到了最後的審判前，沒有人會知道，真理將落在誰人手上。」

我也很敬畏，很敬畏。曾與趙先生談話，再一次令我覺得香港出產到大藝術家、學問家，我忘記了，我之前有沒有這樣子面對過一個master。

今日消費

跌鬼左ppc支筆，即係用來篤篤篤o個支野，去買番，竟然要$69。問店員：隔籬支$25係乜來，做乜差咁遠？佢：o個支雜嘜來喎。好啦，畀錢。事後我諗：乜我個樣似富貴咩，做乜要買名牌？

蠢O左。我仲以為十皮搞掂。

買大陸版王菀芝(連dvd)，$48。《大姨媽的後現代生活》，大概找不到人陪我去看了。買吧，大陸版$28。

支死人筆貴過人地成年心血創作，你話做創作幾唔值錢。我已盡量抽時間去戲院。

o個支死人筆，我懷疑我一年會跌幾次。再跌我就用牙簽代用！

惡補

個人懶，睇住成疊人言報，剪低o既投資風險教育講座07系列（由公開大學同證監會合辦），無乜心機睇，因為畀我見到右下角有資料有網址。惡補下先。聽曹仁超定林少陽先好？

Reading Reading

聽住電台新聞，又話旺角搵到兩隻禽流感雀雀。超，本人覺得，所謂禽流感及其未o黎到已經做成o既恐慌，係西方藥廠及各大全霉做成的。中醫話：SARS之前中國沒有瘟疫嗎？中國醫聖(兼第一個臨床中醫大宗師）張仲景就係生於瘟疫年代。人類o係地球咁多年，雀鳥又有幾次患過瘟疫呢？真係咁值得驚？（記憶中真係做成恐慌o既SARS出現前，反而無人作過警告）

西藥廠+全霉業，幾日內可以做成一間藥廠股價大升；甚至可以令中國藥材八角價錢大升。小弟對醫藥可能認知不足，但對全霉此邪教的影響力有一定認識。唔係話全霉幫佢地搵銀，因為全霉佬其實無你地諗得咁有腦，佢地腦中都只有短期利益——即係單新聞夠爆，吸引到人已經交足貨。

單料人地做咁大你縮三格咁細？找死！事實上，禽流感就算只有1%爆發，都係有機會爆發，等於世界末日/千年蟲，無事當然好，你講下左無人會怪你惟恐天下不亂的。

－－－－－－－－－－－－－－－－－－－－－－－－－－－－－－－－－－－－－－－－－－
睇書，睇書，大把時間睇書。

床頭一堆書，由地下lum到高過張床。結果又買過新書，唔知係咪個人太貪心定係唔定檔，又或是佢地唔夠吸引，好少書引到我一野睇晒佢。

呢個星期又買左兩本。第一本叫一章木椅。睇左四十頁就畀得十個推介。


作者由孟子一個古仔講起。話說有日孟子突然返家，佢妻子事前不知，孟子暗中一睇，嘩頂你o丫，我老婆點解伸開兩腿坐o架！於是決定休妻，返到屋企，老孟同老母講起此事，點知呢，畀老母教訓左一頓！話佢乘人不備，亂闖別人私人空間，才是無禮！

（古人幾講禮！孟子點會估到，到今日中國大陸的禮貌水平，竟然如此）

哈。太精采啦。本書就由坐姿起，講到中國人的度量衡，講解中國人點解咁坐叫做有禮，點解丈夫係丈夫（因為人長八尺，故曰丈夫。而金庸神鵰內裘千尺就講過：丈夫丈夫，一丈之內才是夫！後者當然是穿鑿附會），再講到何謂「正宗」。

佢話：

「正宗」，是意味著經過認真判斷，嚴格選擇及設立種種限制的形式。例如嚴格的音韻之於詩篇，經過選擇的活動的活動為運動興之所至會令人手舞足蹈；但西方的芭蕾舞卻選擇及限制主要在兩隻腳尖上進行，訓練時很吃苦，訓練的成果卻受到極大的推崇。

簡單地說，「正宗」是「別以為可以草率了事」的意思。

要好好看這本書。

有事覺得自己是愛買書多過愛看書，以後要改一下。相比下寫blog其實不那麼重要。



另一本是人體使用手冊，這是小弟認為幾正統的中醫理論書。此書在網上流傳已久，我懶得介紹了，聽過人講一排，近日得知有簡體版而且去一睇發現貨量甚足。又其實本書周圍都有得下載，原作者似乎也不大介意，佢仲寫左個blog。有興趣不妨去睇睇，睇完覺得o岩先買，簡體版o係灣仔新華書城賣$29本，我一次過買左三本。兩本送人。