[唔要供屋要公屋]：Inception之天國的階梯

　
文：抄豬，以利人

（點解公屋個朵花？點解你想買樓？點解你覺得你買得起？點解……）

睇完上面兩篇文，有冇丁屎咁多覺得個世界呢輪係咁嗌復建居屋係很笨實的事呢？響如斯變態的樓價底下，連居屋都買唔起嘅大多數人，可以點樣「安居樂業」呢？買舊樓又驚遲早俾田生「成功收購」。租樓咩？三、四千蚊先租到個百呎套房，想慳啲駛，啲劏房呎價仲貴過豪宅，俾木蚤咬到阿媽都唔認得都算，至驚燒死都唔知咩事！然後我地本來應該將視線轉向公屋，但硬係覺得公屋唔知點咁，怕俾人話同阿婆爭，又怕人話拖冧市——明明你知道香港樓貴到黐線；明明你知道地產霸權；明明你知道官商勾結；明明……

其實，大眾對於公屋嘅睇法從來都唔係鐵板一塊嘅。七十年代前後，人人都話上到樓好過中馬標。但到左八十年代，香港經濟起飛，加上英國佬有意識咁將更多人推向私人市場，仲要起勢咁宣傳公屋係俾低下階層嘅福利，公屋形象先至跌番落黎。不過呢，到左樓價高到冇朋友，劏房呎價貴過私人樓嘅今日，呢支歌應該要變成絕響了。

公屋從來都只係為左個市
講到公屋嘅緣起，最主流嘅講法係因為一九五三年嘅石硤尾木屋區大火。聞說係英國佬為左改善居民嘅居住環境，所以先開始起公屋。Sorry，事實並唔係咁。其實係因為發現兩個禮拜嘅救濟費已經夠起六層高嘅「徙置大廈」，加上當時嘅土地供應緊張，英國佬先會咁好死叠高啲居民。到左六十年代，香港要發展工業，英國佬為左騰出空地起工廠先認真計劃起公屋以降低居住成本以提供工業資本家廉價勞動力，同關顧居民嘅住屋狀況一啲直接關係都冇。

到左八十年代，新自由主義隨住戴卓爾當選首相而空降香港，於是香港嘅房屋政策就轉趨市場化同商品化。加上當時咁啱遇上大陸改革開放，工廠北移，工業既然冇得撈，英國佬咪放棄低租壓工資嘅方針，開始鼓勵港人「置業」囉。「置業」者，買樓也。一九八七年，英國佬推出為期十五年嘅《長遠房屋策略》，決定房屋政策由私人市場主導， 減少公屋比例。自此，「鼓勵（ 出租公屋）住戶自置居所」正式成為官方公開嘅方針，而為左滿足所謂嘅「民間置業需要」， 佢仲推出左一堆措施推動住屋私有化，總言之就係焗鳩啲人入私樓市場，托起樓價，養肥地產商。

到九七金融風暴，樓市收皮，再加埋零零年科網熱潮爆破，雪上加霜。當時嘅規劃及地政局局長孫明揚就推出左聞名嘅「孫九招」托市，內容包括停建停售公屋、為低收入家庭同公屋居民提供免息貸款計劃等等——總之都係焗人買樓啦。而果啲咩公屋富戶呀，同阿婆爭樓住之類嘅講法，就係響呢段時間生成，絕非空穴來風！

公屋本來係房委會生財工具
咪以為公屋真係咩福利救濟呀，其實公屋本來是賺錢的！家下主流嘅出租公屋曾經叫做「甲類屋邨」， 響七、八十年代係年年都搵到錢嘅生財工具， 足夠填補以徙置區為代表嘅「乙類屋邨」嘅赤字！ 雖然話公屋租金低過市值， 但遠遠唔可以話係福利。

不過呢，順住《長遠房屋策略》嘅推出，「甲類屋邨單位」響八八年嘅房委會財政改革之後就轉盈為虧。點解？因為房委會改革之後必須為政府注入永久資本每年5% 利息，仲要將非住宅樓宇（如公屋商場、停車場）所得盈利嘅一半上繳庫房，而轄下嘅屋苑經常開支就繼續獨立於政府帳目——即等於政府unun 腳等收錢，房委會蝕錢就自己搞掂！於是九零至九一年度，每個甲類單位就平均錄得86 蚊赤字， 但每戶租金裡邊作為支付政府利息嘅部分就高到去155 蚊， 簡單黎講， 就係政府榨乾左房委會公屋盤數！

為左廣開財源， 房委會就必須為執行政府嘅住屋私有化政策為驢為馬， 左手接連大富戶政策變相加租， 右手廣建居屋漁利。公屋變得冇利可圖不特止， 仲要係咁蝕， 梗係大幅收緊啦， 然後唔夠公屋喇， 就話呢啲係俾最慘嘅人或者阿婆嘅福利咁囉。

買樓Inception
七十年代私樓個價已經開始上漲，到八、九十年代就更加係「磡磡聲」咁上，由九零年到九七年嘅樓價升幅一直高過同期工資升幅。雖則九五年樓價回落，但到九七就升番一倍！九三年一個市區四百呎單位差唔多等同一個本地大學畢業生十五年嘅收入。如是者，私樓就無啦啦變成響高通漲、低利率、工資增長不足嘅困局裡邊嘅保值工具，買樓變成最穩陣包贏嘅投資，今日流行嘅「上車盤」或「第一桶金」都係嗰期嘅產物。當住屋由居所變成用黎保值甚至投資嘅商品，佢嘅使用價值就會屈從於佢嘅交易價值，即明明住緊唔會賣，心情都會隨住樓市升跌起伏，「住屋權」嘅理想響個個都渴望買樓升值嘅情況下實好難聽得入耳。

呢種心態其實好變態，要間屋響通脹之下保值，即樓價一定要升啦， 咁樓價升， 下手就要用更多錢買你間屋， 咁一層壓一層，如果中間一有咩閃失（ 如SARS 降臨）， 就冚家富貴一鑊熟； 但如果冇閃冇失， 就意味住未買到樓嘅人越來越難買得起樓了。

上年施政報告發表之後，運房局局長鄭汝樺響公開場合講話「唔係鼓吹買樓先有幸福」，佢冇講錯架其實，皆因政府根本唔係鼓吹，而係焗人買樓嘅始作俑者。政府自《長遠房屋策略》以黎嘅一連串措施都係為左托市，係咁生產只要補地價同埋等到咁上下就可以響市場度賣嘅居屋同「置安心變種居屋」，借貸鼓勵唔同階層嘅市民響私人市場買樓，都是吸引人以「第一桶金」買「上車盤」，順手就incept 左呢條公屋-> 居屋-> 私樓嘅「天國的階梯」入我地個腦度的，目的就係為左令我地諗唔到買唔起樓捱貴租係因為佢起勢咁托市，諗唔到自己輪唔到公屋係佢起得少，諗唔到樓係用黎住唔駛攞去炒，諗唔到……