老曹寫林sir

森池兄教大家做「平民資本家」，此話冇花假也。森池兄牙擦之處係自己平民出身。1970年年我老曹有二萬元資本、森池兄亦唔會多我老曹幾多；今天森池兄家財不但夠厚，而且仲好落力做善事，呢次開show係佢貼錢買難受（不但所有收入全部捐畀香港大學，送出新書則由佢自掏腰包）。有人出書教別人點樣賺取一億元，但佢自己係咪已賺到一億元則木宰羊。森池兄十五年前已賺夠一億元，至於過去十五年是否令財富翻兩番則不得而知。教人賺錢，自己未必一定已賺到錢（例如教練可訓練參加奧運運動員，而自己運動方面未必叻）。不過，由已經賺到大錢人教你，係唔係好D呢？我老曹認識唔少朋友都係憑自己努力賺到大錢，但只有森池兄肯將自己所學公諸於世，上述做法令人尊敬（中國人不及外國人地方，就係樣樣都係家傳祕方，唔肯公開）。外國人成功後都寫書，中國人好少有上述習慣，森池兄係少數先行者。我老曹希望更多香港人成功後，將自己成功方法公開，只有咁樣，中國人投資智慧才與日俱增，有一天能挑戰華爾街。