老曹海嘯警告

唔怕你來，最怕唔知你幾時來。
　　

上周美國新世紀金融公司申請破產保護令，上周五American Home Mortgage Lender發出2007年首季及全年盈利警告。根據Mortgage Implode-O-Meter報道，去年底至今已有五十間次級按揭公司出問題，估計上述只係冰山一角。次級按揭公司出問題已非新聞，問題係對美國經濟影響係點？今年約一萬億美元貸款利率須重新訂定，其中80％貸款者無力負擔較高利率，估計影響超過一百萬美國家庭，情況較英隆事件更嚴重；亦較1990至91年次房地產軟陸更壞，甚至超過1987年10月股災。但投資界似乎一D都唔關心，情況有D似兩年前海嘯發生時，唔少遊客居然相機拍照，小孩子更跑出來睇奇觀……完全忽視海嘯破壞力，五分鐘後造成超過三十萬受害者。今天我地面對美國次級按揭問題，係咪一如兩年前聖誕節翌日，因唔理解海嘯破壞力，反而當奇景睇而相機拍照？我地面對一萬億美元有問題貸款，上述數字可能已太大，令一般人無晒感覺。美國次級按揭債券問題真係冇事咩？高潮今年11月，點解咁多人一早認定冇事？危險並唔可怕，最可怕係唔知危險（即冇危機感）。我老曹係膽小鬼，做人處事作風係「寧可錯過，不應做錯」，因為一失足成千古恨，回首已是百年身。1974年7月至12月半年內，我老曹財富由五十萬元變成十萬元之後，須花六年時間（1975至80年），才由十萬元變回五十萬元。我老曹已係極之幸運，有幾多人經過1973至74年後，改變自己一生命運？