超生奇緣

這兩天正苦終於出招，要對付來港生仔的大陸大肚兵團，正好讓我記下以下的大陸見聞。

早前回鄉的最後一天，有錢親戚請飲茶。早茶一百幾十，地方已是高級得像香港五星酒店。酒樓的那個樓底，大概有三層樓高。午餐再吃，主人家堅持要請吃好一點的，中山最出名是吃蛇，這一餐據說找數要近千元，即是一個中山工人的平均工資。有朋友說到了上海去，當地人不停的請她吃喝，「佢地係好熱情好客，但隱約感覺係『我地上海人生活唔輸畀你地香港人o架』！」這一次我也有同樣感覺，特別是看到吃剩的，媽的，比香港人還要浪費。

席間，大家談起某某當年的驚險事來。當年有錢親人富起來的同時，卻無意間搞大老婆個肚，弄出了第二胎，「十幾年前有第二胎罰幾萬蚊，但近幾年要罰十幾萬，如果在國家工作，仲要即時炒魷，終生不再錄用！好大件事！」

乜野人可以有弟弟妹妹呢？原來要耕田至得，如果夫妻都是農民，可以生第二胎；城市人搭農民，或者城市人搭城市人，都只可以生一個。

唔搞都搞大左個肚，點算？大肚婆仲係o係國有銀行工作，月薪三千小事，兩公婆都無左份工大件事。

聽講在某些鄉鎮，重男輕女，但只可以生一胎，習慣係將可愛的女嬰丟到河裡去。

「其實政府管得好嚴，未婚女子每三個月要驗身一次，就來要去驗，真係好驚！」

「鎮政府管得嚴，但其實只要你唔係o係我個鎮生就無事，因為戶口唔係落o係當地。」

一家人最後表決，要冒一個險，因為表妹與大肚婆長得有點相像。表妹說：「諗番起都仲好驚。到左驗身當日，大肚婆同我一齊去驗身，登記完佢就借故走左，我入廁所戴個眼鏡，改改髮型，就拎左佢個病歷去驗身。仲記得一路驗一路驚！」

但表妹自己都未婚，點算？「最驚係第二日，我自己再去驗番自己個身份。因為有限期我都要o係o個幾日驗，結果一去到，雖然戴左眼鏡，但姑娘都即刻問我：你唔係禽日來過咩？」

「我話我禽日登記完唔舒服，結果返左屋企，結果過到關！」我問佢醫生係咪同一個，佢話係！我心諗：不過可能醫生每日要驗好多個，又或者，當地醫生做事根本好hea。

三個月驗一次，咁好快就要驗第二次，懷胎十月起碼要驗兩次，下次又點過呢？

「其實一有左，我地即刻去搞投資移民，咁o岩過左第一關無耐就批左！結果第二個仔去左澳門生，鎮政府見你有晒批文，無搞到佢地，根本唔會理你。」諗番都幾荒謬，如果認真o的一驗，應該發現你個肚有6個月以上，咁點解上次驗唔出你有左呢？

「所以呢度好多人都鍾意落香港生仔，唔畀錢？唔會啦，大家都願意俾錢o架，落香港生4萬幾蚊之嘛，如果o係大陸，超生要畀多十萬！落香港慳番十萬仲有咁好服務喎，梗係抵啦！」

蔡東豪早排話星加坡搞醫療package搞得好，幾千蚊，平過香港順道有得玩，水準高，佢自己剛試左之。其實香港係咪更加有得搞？大陸咁大個市場，搞得好，點解唔會好似香港幾萬蚊一呎的豪宅咁好賣？大陸有錢人多得咁犀利。