信教

對於成日傳聞中央要（透過港苦）對付港台，例如要佢自負盈虧。我等自少聽港台大的，自然感到不是味兒。現今社會乜都講效益，而效益又只會能用量來衡量，即係講錢、錢、錢。

當所有節目都講錢，即係講收聽率。咁，電台節目都會變晒乜周刊同生果日報。

我成日覺得家下做全霉，講野係唔使負責的。例如你睇波經版、睇財經版，邊使用腦寫o架，總之是但貼一邊，要用的理由嘛，例如波經，隨便你揀：近期往績、對賽紀錄、盃賽/聯賽紀錄、陣容變化、士氣等等、甚至領隊風水八字都有。當中完全無準則可言，總之就係求娛樂性，即係要你輸，都輸得高興。

波經還可接受，皆因本人從不賭波（除六合彩，原則上會變廢紙的都不買），但總覺得老豆輩賭馬有型過賭波，起碼講血統、講練馬師，樣樣有family tree，有跡可尋有水可吹。不過講到財經，做全霉o既真係講乜都得，唔似做基金經理，輸錢佢地唔使負責。

如今我只聽香港電台普通話台一個財經節目，但如果港台變商營，段估所有財經節目講窩輪、畀輪商包來做，大家亦再聽唔到林森池大師講股了。

如果諗住係開民智，即係搞教育，邊有得下下講效益o架。我意思係，呢o的效益關乎人質素o既提升，要到十年後廿年後先會見到。

雖然平日我係聽商台的，港台總係有唔理市場的好節目，例如李天命幾年一次的特輯。呢半年，每星期我總聽聽ltv cafe，捧蔡東豪場。港台最正係可以免費翻聽。

最新推介有倪匡solo做左個節目，7號開始，叫做倪匡看世界。倪老匡講野一舊舊都可以做電台節目，真係夠薑。唔知有幾集呢？

節目內容，哈，竟然係有新意的。最正係佢講信教，當中講到自己幾次的宗教經驗，例如講點解信教、點解會戒到煙。大家身邊總遇過傳教朋友吧，我問到佢地宗教經驗，竟然有好幾個問番我轉頭：乜野係宗教經驗？

唔係下化？你點解會信教呢？唔好話我知係因為有人帶你去教會，牧師叫你信者就得救，結果信左。倪匡講得好：教徒總可以同上帝對話嘛！係囉，咁都做唔到，其實你信緊乜呢？（話說回頭，哲學o的咁講，同倪老匡對話的都未必係上帝，可能係魔鬼呢。不過信教信教嘛，講個信字，如果咁懷疑，就算上帝現身你面前變作個慈祥老人你都可以懷疑的。）

無錯，小弟雖然自小接觸基督教，但未入過教喎。信教女朋友就交過一個，朋友及自己的經驗告我：無信仰男仔＋基督/天主教女朋友，很少有好結果。希望這不是事實的全部。

教會總是給了教徒很大很大的壓力，這是我對教會很有介心的原因之一。還有朋友給教會（即係由傳道人發言啦）拆散鴛鴦。真慘。過後他說再不敢交信教女朋友。

要一個信教女仔，獨立思想好似倪老匡咁強，實在有點難。倪老匡唔返教會，而且捉得住教義重心，信教信得瀟灑。佢話：基督教講一樣野之嘛，就係將人生的重擔交畀上帝（大意），其他人生上o既野都可以唔使咁緊張。所以佢信得輕鬆，信得有型，又能遊戲人間。我見的基督徒多為相反，六合彩都唔買得，戀愛（同非教徒）又要問問傳道人意見。

唉，人生在世幾十年，轉眼就過。難得遇到個人，好好談次戀愛先講啦。