港碟末路

以為謝安琪出新碟了，昨晚收工到灣仔逛逛街。聽收音機方得知今日先出。
結果買了簡體版陳奕迅《Life goes on》$35、簡體版《三峽好人》（連前作《東》）$48，又在商場附近買了盒裝十隻碟的大陸版《黃帝內經》，$98仲執笠減價收$88。

從前我是不買大陸版港碟的，當時全港只有德發商場、灣仔298電腦商場有一兩間，買時感覺有點像買盜版，又，想到欣賞的歌手，不是會收少好多嗎？像謝安琪，如果我買簡體版我驚佢肚中個細路食唔飽。（不過佢無簡體版，好明顯佢連大陸個market都未有。）

近日發現這類水貨店愈開愈多，上月才返大陸，我記得買過一張王菀芝收22人民幣。22到港賣$35，如此利潤當然愈開愈多了。而且，好明顯香港唱片行業再唔高興，賣水貨都係唔犯法的。

陳奕迅、張敬軒新碟都賣緊簡體版了。王苑芝、方大同未，我唔知係咪特登延遲推出，等香港「硬蕊」迷買左先。

當初唔買，到後來決定買，改變原因係：既然印度的電腦人才都可以同香港匯豐的電腦人爭一個職位，全人類都講緊全球化，理論上，全球的同一類產品都會傾向於售賣同一個價格。除非有行政手段防止你套戥（2628 A股同H股爭40%+價格愈走愈遠），又或者係產品係非常限量（全球都有市場，多左人認識，其實多左人爭價格可能更高）。

只收1/2到1/3價錢，喂，如果同期推出，點解我要買港版呢？除左簡體版設計「柒」o左少少（Life goes on多左4個中文字「生命延續」，喂香港都係中文地方，專登玩英文你又寫番個中文出來，而且，唔係「（還是要）繼續」而係「延續」咩？），紙質又的確係差o的外。音質方面，我不清楚有沒有分別。可能有，但對師奶大眾來說，Who fucking cares？

同大陸競爭的行業，相信同我一樣，會相信不單止港幣會愈來愈弱勢，連港碟都會愈來愈弱勢，唔知幾時香港唱片舖會正正式式引入簡體行貨賣呢。

唱廣東話的港星，你有信心打進大陸市場嗎？你唱得贏張敬軒嗎？

張學友新歌唱國語了，葉德嫻出山都唱國語o番。星爺都唔玩港式無厘頭了，周潤發回來拍的不再是港片，而是黃金大片。形勢比人強，港式文化似乎註定變成大大大陸的一個小小小方言。