2006年12月30日星期六

老豆變阿叔

趁回來不久,記一記,補一補習家族的人物關係、中國人獨有的親屬文化。其實我相信在地球那個角落,這種極其複雜的Family tree都在消失中,最鍾意生仔o既中國人有一孩政策,其他有錢國家根本無人想生仔。

我公公的父母(點叫呀?外太公?)有七個孩子。當中大、三、四、五(公公)是兒子,二、六、七是女孩,本來3+4是一流的「組合」。

由於自己兒子多(4子3女),結果早年把第三子過繼了給一家有錢人,即係賣仔囉。我媽說,被賣的三伯公由始至終是知道自己被賣的,不過那是當時的文化,有錢人媳婦沒男孩出,就去過繼一個回來好了。(做老婆o既生唔到仔有幾慘?可想以知,老公其實可以娶第二個喎),過繼後孩子是要改姓的,也漸漸會疏遠生父。

不過沒想到過繼後,大仔就夭折了,原因不詳,年代太久遠了。於是突然只剩下兩個兒子。

大仔死後,父母還替他辦了一堂法事──找個鬼新娘。據講做父母的,要辛勞的替兒子在村內找個去世不久的女孩,對一對八字,沒問題就雙方父母四四六六拆掂佢,做個親家。聽到這裡,有點寒意。

當四子生了一個男孩時,由於傳統也由於以為自己仲有仔生,於是把兒子過繼了給死去的大哥。這個被過繼的兒子,就這樣糊裡糊塗的做了長子嫡孫,他也就是我這次回鄉探親,富人之家的大老爺。過繼後,他把自己的父親喚作「阿叔」。而他亦無「阿爸」可叫了,因為佢老豆突然換了是個死人。

可惜四子之後也無再出子女。上帝真係大整蠱。

2006年12月29日星期五

紅人說

這兩天看了兩段訪問,兩個都姓周,一個今年紅,一個紅左好多年,都有野學。學做人,學relax。

周中:整多舊雲,明日又散掉(from日月報)

「個個以為我發達,其實蝕本,不過開心」。很多工作只得到紅封包,但他倒很樂意: 「幾好玩呀,可以見識很多東西。人家給你機會,不是人人有的,又不是要付出什麼,只是花一點時間,當看本書。書是人家作的, 不如自己親身去『看』。」畢竟經過人生不少歷練,人氣急升的周中,仍然腳踏實地: 「我覺得這一切很快就完啦,就過氣啦,也不用懷念,人生很快便過去,別人也很快忘記。」

來年,周中的願望很簡單, 「我希望多些時間周圍旅行, 輕鬆下。」跟太太一起?他答: 「咁梗係啦。我成日不見人,而家都要交番人啦。」不想再上一層樓嗎?他說: 「我本來無一物的,現在整多舊雲出來之嘛,明日又散掉,無晒啦。我已經很幸運, 有很多第一次,上天給我很多,還想要更多,會折福的啊。」


周潤發:港星最多顧慮(from一兜刊)

我約過很多藝人,會面地點成了頭痛問題,他們會說:「不要揀公眾地方,太多fans,食餐飯都唔得安樂 ……」周潤發就證明到,在大牌檔安安樂樂吃了半碟雙拼、一盅螺頭湯。也有食客急急要求合照的,周潤發先問對方鄉下何處,從福建到蒙古,天南地北聊聊鄉情,合照呢?等彼此都吃飽才慢慢來,更見互相尊重,賓主兩歡。

所謂不便,不過如此而已——試問還有誰知名度高得過發哥?「還是他們(指藝人)的不便,是驚到時沒有不便?」周潤發笑說:「萬一在公眾場合沒有人或者少了人找簽名影相,會好空虛嘛。全世界最多顧慮就是港星。「
藝人從觀眾到的,永遠比觀眾從藝人到的多。有些人支持了你三十年,一個偶然機會才第一次見到你真人,你動不動就話要保留私人空間,怎說得過去?」


發哥仲講到攝影,當然係影菲林


「商業電影有太多計算,預先打靚燈光,甚至加上電腦特技,千軍萬馬任指揮。我拍的是風景,大自然不遷就人,要學識等待。我不喜歡數碼,拍完即刻見到效果,不滿意便delete,太急進。有次在山上遇見一個用數碼的,他說:『無乜影,拍二百幾張咋。』我就拍完一格菲林,回家慢慢思考怎樣配製沖曬藥水,然後出來可能衰,亦可能有四個字是錢買不到的,叫『喜出望外』。

2006年12月26日星期二

R.I.P.- James Brown

看有線新聞方知道james brown去世了,肺炎喎。上youtube一打james brown,o的網友已經留晒RIP,睇番LIVE 8佢仲扎扎跳,你話做人幾咁化學呢。

今日聖誕呢,出年聖誕唔知記唔記得佢啦。我講緊james brown喎。

曾經睇過有網站話stone roses o係james brown身上偷過師,特別係首fool's gold個rythmn。之後一睇個個話呢條肥佬好堅,諗過買jb o的碟來研究下,又未有的起心肝。

James Brown當年就已經話:"Say it loud - I'm Black and I'm Proud!" Michael Jackson肯聽佢講就唔搞成咁。JB因持械入過獄,不過你睇佢上Live 8,跳住o的老套舞步(有興趣搵佢後生時片斷睇,對摩打腳真係好勁!)、膚色依然濃過朱古力,唱番首本名曲(即係食老本啦),大家依然尊重佢,拍爛手掌。

咁佢表演又依然有睇頭喎。

比我更加唔知JB乜水o既,不妨聽聽佢首Sex Machine,o個手bass/rythmn勁到爆炸喎,disco始祖呀。不過大家熟悉o的,應該I feel good。我唔鬼記得邊個牌子番出來做廣告歌,搞到佢近年又紅番。

的起心肝的起心肝,呢個月預六舊水去買盒《帝女花》boxset得咋,咪再拖咪再拖。

2006年12月25日星期一

對錯

去了中山三日兩夜。咁大個仔,老豆個鄉下去得多,老母o既,三十幾歲第一次去。本來應該帶女友,結果淨係帶左部CONTAX T3。

本來計劃係兩老自己去,我見留港都係無聊,老豆鍾意留港賭錢,話不如我陪老母去。老豆到最後一刻話擔心我倆,結果去埋,我覺得佢係有o的唔好意思。如果我媽話自己,佢可能話ok的,畀我窒下佢,反而佢「懶」係盡責。

老媽子講過多次,話細個「阿拉」好錫佢,中山人叫阿婆做阿拉。而當年佢三表姐,由於老媽子(即係我公二家姐)改嫁,為免做油艇女,所以同我媽一齊,留在阿拉身邊。我媽經常說,當年這兩人最錫佢,當中以阿拉為甚,同一個年份,我老豆在東莞幾乎無餐有野食(最餓時),我媽因為同阿拉住,所以竟然有雞髀食。由於阿拉共生下七個仔女,邊個搵到食,邊個都會畀阿拉。有時全屋只有一只雞蛋,阿拉都會畀我媽食。

後來我媽漸年長,要到香港跟番阿婆,阿拉說:「你在中山,一個人可以食晒成隻雞蛋,但出到香港,一隻雞蛋你要七姐妹分(我婆又係生七個,仲七個都係女),你要明白!」對於我媽來說,阿拉明辨是非,無讀過書,但講得最多道理,講做人對錯,最鍾意同我媽講何謂對錯。

阿媽話:「要到長大,先至阿拉好叻。」據媽子講,阿拉甚至極有藝術天份,隨手拿起鉸剪就可以剪出牛羊貓狗。我記得睇discovery見個一個咁o既阿婆,住山區的,還在生,其剪紙作品可以拿到美國紐約博物館展出,但在家鄉得靠種田為生。她在村內也受歡迎,每每有人結婚、喜慶,她都是表演嘉賓。

但記得很清楚,discovery跟了她足足一年。後來她老公病了,都沒有錢去醫,結果拖呀拖,病死了。證明在中國農村做藝術天才,只能有party時做下天才表演。故事結尾時,她在中國開了個剪紙展覽,有agents過來跟她說,希望婆婆能剪裸體女人,胸脯剪得大一點,會好賣。

吹脹。


講番中山先。
阿拉去世多年,剩下三表姐,我媽說,這是中山與她感情最厚的人,當年兩老表一齊訓,輩份上我叫她「姑姐」,但這個姑姐今年已經七十了,經常笑,在香港我沒見過這麼親切的婆婆。又令我諗起我阿「女麻」,但我「女麻」甚實惡到死。係會亂講粗口小人o個種。

三表姐有一個女兒寶姐,今年大概四十多,離婚了,女兒有一個兒子,今年廿五。三口子相依為命,女兒月薪一千、其兒子月薪八百。

我媽又想起阿拉,佢話阿拉真係醒,當年心諗三表姐與我媽咁鬼friend,但我媽遲早要去香港,為免兩家人愈來愈遠,於是要媽契o左寶姐做契女,將兩家人下一代再拉番近。

去的過程中,阿媽說,中山的親人好多好有錢,我地去最窮o個家住,就係呢家。後來我才得知另一家,即我媽的堂哥有幾有錢。亦聽了不少大陸荒唐事,下次寫。

媽說:「講親呢,就一定係堂哥親,但呢個人好剋人憎,當年我返來,寶姐同我去到佢門口,大字型攤o係度同我講野,佢一眼都唔望寶姐。多年來一O的都睇唔起寶姐窮。」

哈,我媽呢樣野不嬲幾有型。是非觀念明確。即係學阿啦o既。

我哥講番起來,都話阿媽由細到大講「對錯」,即係阿拉身教o既。我哥講時有o的驕傲,但又講番好多朋友,完全無是非觀念,「o係屋企亂Q咁O黎。搞左大大鑊,老豆老母會講話:下,咁呀?哦。」但結果事業都好成功。

不過我估我幾兄弟,到有一日有仔女時都會係咁,由細「哦」到條O靚仔大。

約定

趁聖誕前提早收爐,休了好幾天假。失戀又沒有甚麼朋友好找,索性跟父母返了老母鄉下,過幾天沒有電話(第二天就關了)、沒電郵的生活。

回來又開了電腦,看看估渣,笑了一輪;又看了空姐elaine,歎息了幾下。然後鼓起勇氣,打電話給她。

個半月忍住一個電話都沒打,信中告訴她月尾會打給她。因為她好友說她有點怕我,事前告訴她好了。一直期待著今天,到了反而有點怕。

心裡說八點打,一直拖到九點。到了洗澡時突然想起,分手前她說過父親要入院做手術,沒記錯日子就是12月25日,即係聖誕,今日囉。

有點奇怪的想法,怕手術出了問題,她身邊沒有人。說想法,其實是幻想的,有晒情節。

九點半鼓起勇氣,打就打,預o左你唔接。

「鈴鈴鈴...」一把男人聲音:「喂,搵邊位?」

超,點會男人聲o架。諗o左一千個情節,當中無呢個喎。咪住,當日一分手,我即晚將電話內的偌稱改了。以往我經常「腥錯」msg畀佢。呢把聲,應該係佢老豆,唔通改錯o左佢屋企電話。

「XX呀,聽電話呀!」聽見她媽媽在後面幫忙聽的聲音,我沒有估計錯。

「喂喂喂...」電波中突然有一陣干擾,事後原來是一個前輩腥來「merry x'mas」訊息,多謝你,但頂,又會咁o岩呢個時候腥。


大家再「喂」了兩下,我知道她認出了我的聲音。「喂喂,你知道我係邊個呵?」劇本本來第一句對白不是這樣的,「知。」她聲音比我想象中平靜得多,「聖誕快樂。」我說,這才是本來「喂」後的對白。

「你都聖誕快樂。」

大家談了兩分鐘,我主講,問問她父母怎樣,功課怎樣。然後她問了我一句:「這幾天都要返工?」我說放假,跟父母返了中山,我本來說「鄉下」,臨到咀邊又記得佢媽鄉下亦在中山,佢仲有個鄉下親人係乓乓教練,當時我地「約定」話返去訓練。她只說「咁都幾好O丫。」然後有點冷場,我直接了當問:「得閒遲o的食餐飯?」本來我想話「聽日食餐飯?」答:「遲o的啦,仲有份功課未做。公司有個活動,要12月尾做到1月會得閒o的。」

「我過左年打畀你。」我話。
「等我過左年,忙完打畀你啦。」佢話。(即係叫我呢排唔好打畀佢?)
然後她說:「咁,亦祝埋你新年快樂。」我不懂回答,呢下覺得佢勁左,不再是那個哭哭啼啼的小娃。

ok,約定一月。估計起碼做得番朋友。

就當是今年聖誕禮物吧。起碼比我想像中好。

2006年12月20日星期三

re-discover

我相信
每個人, 每件事物都deserve你給他2次機會
起碼兩次
生命中, 最好的事物起初都是不起眼
或錯過了。

今日, 翻聽這隻被打入冷宮的「舊碟」
「再發現」這隻(幾隻)歌
換一換佢先
(from dj shadow被die-hard fans鬧到死o既the outsider), 部份歌詞如下:


"What Have I Done"
(feat. Christina Carter)

I speak from the heart
I fear beginning
I must go
Broken and soaked
To the wider world returning
I’ll never be sullen again
Something is wrong
I can’t stop my thoughts
I tell myself to stop them

Stop, stop what you’re doing
I guess I’d better face it

The thoughts are sabotaging me
Even though they are mine
It feels as if it is physical
Like being in a different world
Weirder
As if somehow things just are

Let’s go ahead and get it over with

Don’t be afraid
Can’t you trust me
We all have thoughts
And we are together
We are together
I am your healing spirit
I am your healing spirit
I am your healing spirit


Healing spirit

There is a boy
Standing in a meadow
Looking out into the sky
And hundreds (and hundreds)
And hundreds (and hundreds)
And hundreds of butterflies
Lift off from around him
(Lift off from around him)
That’s all I can remember
(Lift off from around him...)

父子

趁聖誕前提早收爐,遲遲才去看《父子》,星期二嘛,請埋朋友睇都係$90。
對於譚家明,報導說上一部戲已是17年前,那個時候小弟尚未成年,最深印象的譚導演作品是82年的,原來已是24年前,我只記得那場電車戲,湯鎮業與夏文汐(當年性感有型icon)在車上纏綿。

看的是兩個小時版本(是否導演版了?),看罷,朋友話「套戲都唔係講父子O者。」「本來套戲係根據馬拉一段新聞,一對父子賊而改編而成,所以本來就叫《父子賊》。」一邊講,一邊諗,導演想表達甚麼?

別以為我不滿意,相反,我認為這是港產製作難得的佳作。
形容人家的作品是「有誠意」,通常等於話套戲眼高手低,於是如果你再問我,我會答「這戲拍得相當細致,也感人。演員的表演是80年代港產片高峰期水準。最最難得是自90年代,香港已沒有人拍這種電影了。」

司馬燕個仔仔叫吳景滔,單單看他一個人表演也就值回票價。戲中有兩幕足以叫他拿影帝:楊采妮「拋夫棄子」,郭富城一個人在家中大發脾氣,吳小朋友一邊哭,一邊叫「老豆,你可唔可以追番媽咪?」;下一幕,依然是在昏暗的石屋內,媽媽離去了,爸爸好惡,他一邊走近爸爸,一邊怕……。

現實中,譚家明是王家衛師父,傳聞當年拍《阿飛正傳》,拍到一半搞唔掂,王只好請師父出山,結果片是譚剪的。
看《父子》,那些景那些情,看過王大導的朋友可會如我一樣:覺得「咁拍就O岩啦!」?那些情節,細致有序;感情,結結實實。《父子》故事發生在馬拉,那些樹影那些黃昏,的確使我想起了《花樣年華》,只不過香港已經沒有這種浪漫情景了,於是王大導要拍香港,只好回到了60年年代。

看到了楊采妮要離父子而去,看到郭富城抱著她,求她多給一次機會。楊再設了一計,好等郭與子去遊玩時執包袱,郭回家發現時嚎哭。伴侶離去過,你不會沒有感覺的。

郭富城放盡的演個「死仆街」,但楊也不是「好人」,她一直在問姐妹:「我這樣太自私了嗎?」結果她選擇了跟別個男人結婚,離去了,把兒子丟下不管了。戲中只有「父母子」這三個人主演,甚他人都是閒角(林熙蕾演個妓女,和郭富城拍了兩場實實淨的床戲外,也沒有甚麼戲演),寫郭爛賭,但在戲中他的賭友甚至沒有出現過。而三個人之中,只有個仔有良心,小時候在同學家中偷了一只金表,到長大了也把它尋回,交還同學老父。

最後,當背景鋼琴聲暴至時,是全戲感情最澎湃的一幕。在那昏後河邊,長大了的boy以旁白說著:聽說父親結婚了,就住在河邊,然後,對面岸兩個身形出現了,扶著老父殘軀的是一個大肚婦人,然後兩人轉了一個圈,就消失在黑暗之中。大家甚至沒有看清郭富城的面容。

這一幕,剪接得連只有十分鐘戲的徐天佑都演得太好了。


但何解選這個題材呢?
戲中除了boy這個十歲子孩,那兩夫妻之間甚至沒有愛。
戲拍得盡量寫實,但在香港,畢竟是廿一世紀了。我們不是1930年代的經濟大蕭條,於是拍一齣《單車失竊記》,寫寫現實大環鏡有多殘酷。如果寫自私,周長勝(郭富城)這個死仆街又魅力不足,他不是《大國民》的charles foster kane,為了自己,要買起你控制你,甚至為了贏取掌聲,建一個國家歌劇院,捧自己那雞仔聲老婆做大佬倌,要佢上台出醜!自私,需要權力的配合,才特別顯得醜惡。否則只係蝦下老婆仔女,惡唔起。
香港太多周長勝了。我都見過不了,賭錢把家當子女老婆都輸了。把他們拍成主角,一定感動得到他們的老婆仔女,只是,格局就顯得小了點。

我哥兩星期前叫我帶老豆去睇,好彩無,否則睇完尷尬死,返家途中唔知講乜。家父年輕時就係爛賭如此,如果我媽學似楊采妮,我應該係真實版boy。

都話上一代女人堅忍毅力非凡。
我們就似是最後看見恐龍的男人,看著她們消失。看著自己的母親伯母,再看看街上公司的女孩,我們明白當中的分別的,相信我。有機會再寫。

2006年12月17日星期日

Fame

年輕時,入屋先開唱機。現在回家是先開電視聽有線新聞台,再轉discovery, nat-geo, discover science。社會告訴你要吸收貨訊,人大了,年輕人對事物的熱情就是這樣隨時間消失的。

兩星期前,一條冷逛街一看到badly drawn boy出新碟,買;nirvana的live!tonight!sold out出了dvd,買;看到beatles的love,想了5秒,買埋。
badly drawn boy是近年出碟唔使諗一定畀錢的少數artist,因為前作都太好,這個狂戀程度,之前對象應該是elliot smith,聽他的音樂個心choke住choke住,會想哭的。那幾年,看音樂雜誌說他的演唱會後,往往場內留下女樂迷在飲泣。過得幾年,結果他自己也自殺死了。這些音樂聽得太多大概會傷身的。
另一個近似風格的是創作歌手叫jeff buckley,十多年前就出道沒多久就死了,是游水時溺弊的,出得一張半錄音室大碟。

badly drawn boy新碟其實不驚喜,當然,鍾意的還是建議你繼續買。

至於nirvana的dvd,看得我一個人在家中笑了出來,它剛推出時是VHS影帶,那個年份(90年代中),剛畢業出來做事,迷他們迷得緊要,後來影帶忘記了借了誰人,丟了。
大家都說樂隊最緊要是態度,這,就是態度。
樂隊都喜歡玩live,你叫我上電視台MMO「扮玩live」,我就玩野,專登扮低能唔夾嘴形、扮甩beat,唱片公司要我做的我做齊,但好笑諷刺到無法形容。



看kurt扮女人、看krist與dave的rhythm jam,都使我解放,一晚咁多,一個人在屋中沙發上笑了起來,不想去睡。
能夠使人笑,使人哭,使人忘記時間的──即使是暫忘,都是好音樂。

細細個,看這餅帶最難忘是看到樂隊未成名時,在台上玩stage dive——蹤身一跳下台,樂迷情緒高漲,把他「轆番」上台,但一上台即被「實蕉」兜鎚鍋麵「追dub」的珍貴片段。
影片特別把樂隊未成名,到成名後萬民朝拜剪接在一起,同一樂隊,同一首歌,雲與泥的待遇。名氣是魔鬼、也是心結,迷上牠,註定你一生為奴為僕。
kurt到最後要自殺,多少也是盛名所累。

2006年12月12日星期二

family

12月8日,晴,天氣轉暖。
早兩天收到公關友人寄來的戲票,戲碼是《鐵金剛智破皇家賭場》。多月前乍看劇照、主角造型,笑個半死。怎麼007變成了廖偉雄?近日聽聽,風評竟然很不錯,甚至有7迷說這是"Best 007 Movie Ever"。戲迷說導演把這是一個有血有肉的007,返工會被老細鬧,放工會累,又有家庭壓力。嘩,鐵金剛原來同你我一樣,也許只是性能力比較強。於是很想看。

但幾乎同一天收到朋友電話,說請我去婚禮。

不能不去。說朋友,其實是我哥死黨,我跟哥上同一所中學,數一數,我認識新郎超過二十年。新郎從事保險業,我的保單就是替他買的。你知道,平民百姓永遠記不牢保險細節的,新郎後來轉工了,從事的保險業不做街客,但依然是我的「保險顧問」。三年前,我勸女友買個保險,結果電話問了他幾句,新郎二話不說,出了來替我慢慢解釋。
這保險生意女友是替我小學同學(兼我死黨)買的,不是新郎賺的。他清楚解釋那部份需要、那部份因為經紀賺得多,一定會叫我買但其實唔Q使買。老老實實,我相佢多過自己老友。


婚宴不formal,總數只有八席。哥坐到另一桌去。這一圍,全部係佢中學同學,個個熟口熟面,會同我傾偈,但不是一齊去玩那一種。坐下去起初有點怪怪的。
想當年我們諗的中學,是所謂傳統教會名校,但又唔係年年會考放榜上報紙那一種。學生叻嗎?叻的叻到痺,最叻係賭錢、玩、其次係叻溝女。

呢班友仔,自小就爛賭,中學時返學在後排賭十三張;在街外等人,在笠門未開賭單雙(人數)。席間甚至有人曾把家父過千萬身家(相信不是全部)輸了。
結果坐低未食完第一味「食送」,就在玻璃轉盤上放上匙羹,想玩轉羹!
然後問待應拿啤牌,玩起他們發明的「八張牌十三張」,「阿姐,紅酒成支放低唔該!」「一杯滿三十注呀下!」,大家與新郎哥由細玩到大,也不客氣,第二道菜開始就賭起紅酒來,我也與旁邊的P「夾一份」,只是牌由他擺,酒也由他來喝。我幫手甩下牌,只是湊熱鬧。
酒過三巡,已乾了四大支紅酒,大家面上微紅。侍應醒目,都先把菜在小桌上分好才分發給各人,看剛剛做庄的輸了三十注,即灌一大杯紅酒,也沒半分醉意,可見訓練有素。


哥素來係PR王,只見他拿著酒杯滿場飛。菜吃得七七八八時,就過來跟我兩個屁股坐一張凳。
突然佢問:「喂,你有無見過你哥玩十五二十?知唔知你哥所向無敵?」其實我跟我哥這兩年不一起住關係才轉好,細個,打交打到大,又因為太熟,大家都熟知對方性格缺陷。有幾年,他感情重傷,影響到工作,自然也傷了父母心,我跟母親向來close,跟他關係更差。

更糟糕的決定,是我倆聽從我媽意見,在95年購入一自住物業,作困獸鬥。
那幾年,我事業向好;他兜兜轉轉,轉了工又轉了行,又重新出發。
我是怪他不爭氣。
時間咁O岩得咁蹺。直至三幾年前,當年,那個令他重傷(當然佢亦傷了人家半生)的女孩結婚了,他事業開始有轉機,前年開了自己又做老細又做到似契弟的一人公司,然後搬了到隔籬街住。自小與家人關係不算好的他,與我、與家人也好了起來。這一年,他對媽的好,我亦自嘆不如。夜深,有時會感自己不孝。
然後是他事業有轉機,我事業停步不前。


「喂,我見佢十五二十好Q勁喎!」大口仔指住旁邊另一人,答哥。
「佢?哈哈哈,佢o的十五二十我教o架!我係佢師父呀!」說著兩人已猜了起來,「五、五、對、對、十、十五十五、」喂,其實我聽唔清楚係咪咁叫,咁Q快O既?我兩兄弟細個有猜十五二十,當然是兒童家長指引版。
贏贏輸輸。他突然倒了滿滿的一杯紅酒,「呢杯九成滿呀下!你,你條契弟(替著對面一個老友),你同我猜,一鋪過!包剪耷!」我懷疑佢特登想輸——果然他輸了,他一口氣骨咯骨咯的把酒乾了。男人酒下了肚,叫得更豪氣,酒喝得更多。隔籬檯的一個四眼仔,向著他指指點點,大口仔:「呢條友好似好Q串喎」四眼仔:「你阿哥咁串做乜,男人之家,飲就飲,猜乜野O者!」一睇就知這兩人交情非淺,而且酒量非凡,廢事同你猜。
「小,我都有做人情架,緊係飲啦!」
兩人左拉右拉,愈聚愈多人,十幾人瘋狂對飲。望一望,我見嘉賓已走得八八九九,如非怕他會「當刀」,我應該返左屋企大覺訓。

近午夜,氣氛還是熱鬧的。
雖然,十多二十個男人,有些已站得遠遠的,大概飲得差不多了,怕被牽連;有幾個,站得不遠但特登掉轉背,甚至談起生意經。不過,每次叫到誰人誰人「你過來!」,一個都未推過酒,不得不服。
其實我幾羡慕。

「細佬,你同我過來,呢檯o的人你識唔識得晒?」
「喂喂喂,你咪搞我細佬!我陪你飲!」
「o拿,細佬,呢度十幾個人個個都係friend,除左o個邊o個個肥袋!」他指著坐在角落,一睇,這肥仔臉色白白,半滴酒都無飲過,果然唔夠兄弟。說了一半,他突然嚷了起來:「肥袋,我不嬲唔o係人背後講人壞話,我話:呢度個個都係好兄弟,除左你!不過我好記得,十年前我失戀,係你陪住我,我一世都記得!」肥仔笑笑。「所以你雖然唔係好兄弟,但I love you so much!」說著兩人擁在一起。
「細佬,呢個你一定要識!」哥說著又撞起另一個四眼仔,「呢條友,我同佢相逢恨晚!其實中學已經知對方係邊個,但呢兩年先熟。我同佢今年都有好幾次,佢醉左我送佢,我醉左佢送我。錫番啖先!」兩個大男人咀對咀的親了一下。「畀你咀完好lum!」兩個半醉大男人說著醉話。

再飲得半句鐘,主人家都要返家了。大家終於盡興,拖拖拉拉的離開。
到了樓下,我看大家意猶未盡,果然有人提出轉角邊度邊度有酒飲,都是他們平時聚頭的私竇。說著說,著,好幾個說帶頭先去了。
哥卻在街邊與其中一個猜了起來,「你爭我一杯Straight呀下,下次!」
「夾埋兩杯囉!」
街上剩下四個人。
哥還在說著醉話,「超!阿邊個,唔聽我講,我知,佢係好Buy你。成個灣仔,做XX呢行有邊個唔識你!你難得嘛,搵到錢又唔串,我何嘗唔Buy你O者。」

突然,他跟這朋友說起我。
「喂,你識唔識我細佬?」
「識,頭先都坐埋同一檯。」
「我話你知,我而家檔野,如果成功,我細佬有好大功勞!」
其實我做呢行,乜事搵乜人有o的概念,但平日都只係幫手搵下Contact。一個人做生意,當然好辛苦。
三年前,阿"女麻"突然離世,突然驚覺兄弟(大口沒有姐妹)的重要性。大家不亙相照顧,也可分擔。
這世上最孤單的感覺,就是面對一些只有自己明白的事情。
這時候只有親人明白。
家中突然有事,哥組織部份喪事、我照顧阿媽。他比較成熟、冷靜,在這些關鍵時刻都依然識check單、批評別人。事無大小他都批評,在家中素有「正職係國際評判」之稱。
雖然沒有幾兄弟抱著哭,但事後大家都有想法:一係唔生,一生起碼生兩個。一個孩子,在世上太寂寞了。

灣仔街上。
「細佬,抱一個先!」然後我們抱在一塊。
其實我一於大部份中國/香港人,對感情好拘束。我只抱女友,沒女友前只抱媽。這時候抱了下去,我注意到自己還只是用一隻手抱,事出突然,另一隻手垂著/夾在兩人之間。
「細佬,你大佬我好明白感情係乜,你知唔知!」
「I know how you felt !」仆街,佢一講呢句我就標淚了,我倆在路上再抱成一團,臉貼臉的。
淚溝淚。

剛好一個月前,她突然不辭而別,只留下了一張卡,卡內也沒寫些甚麼理由。或者說,在我看來,是些不太成理由的理由。
工作時克制,回家哭了不夠十日,之後我盡量正常地、平靜地過活。回家也盡量笑。
事發第一天,當然失控。那個早上,我第一個告訴哥。
佢真係配做我哥,佢第一個反應係:「你聽我講,你哥畀女飛o既經驗最豐富!你要聽我講!」
「你而家乜都唔好做,唔好搵佢,唔好打畀佢,如果你唔想將件事變做disaster,就聽我講。如果十年前有人咁同我講,我同佢可能仲做到朋友!」
「你一定想知點解?想住話有得救番,但係,佢部署好一切,就算夠,都唔係呢個月O既事!」
「你可以寫信。」
有好幾次我想去等她,我知道快忍不住時,就找哥談一談。總算忍住了。
有人說,一段感情有幾年,情傷就要休息幾年。我當然還是想她。

哥抱著我:「I love you, brother!」這當然不是醉話。
雖然第二天後我們都不會再提起這件事。
「I love you all, all my family.」我心裡說。本來,我也把妳當作家人。我家中不論大小事,紅白二事,都預了你份。哥回想起來說,就是阿"女麻"去世那段時間,他大大的加了分給你。因為你也把我家事當作了你家事。
那時候,他笑著對我說:愛情有兩種,一種係好o既愛情,兩個人會亙相影響,性格愈來愈好。